مَـــليـــكــة

يا مَليكة يابنيتى ..
لا تتركى حالك وتمشى ورا قلبك
إسمه قلب يابنتى من التقلُّب .. ماتأمنيله ابداً لو شو ماصار
شو يعنى وجع شوى وبعدا تريحى راسك من الهمّ كلياته كوم واحد

ديرى بالك حتى ماتصيرى لعبة يتركها مين ملّ او كلّ
كونى متل الاميرات يلى حكيتلك عنهن كل ليلة المسا تاتنامى بتختك

ماتنخدعى بالكلام العالى .. رنته مابتعيش وما بتأكل خبز
ماتصدقى حدا وتأمنيله إلا لو عمل إشى يستحقك بيه

بتعرفى جرة الزيتون يلى بالصالون للزينة ؟ .. بيها مفتاح

مفتاح الصندوق الأخضر يلى بكيتى زمان كتير تاتلعبى بيه
مافهمتى حينها شو بهالصندوق تا خاف عليه كل هالقد

يامليكتى .. هالصندوق الاخضر بُه ذكريات عيلتك كلها .. من سابع جد
به كل الصور والتذكارات يلى رسلها خيلانك من الغُربِة ..

به صور لإمك وبيِّك ايام ماكانوا صغار وفرحانين بالخطوبة .. كنا كل يوم بنقفشهن عم يحضنوا بعض فى جنينة اللوز يلى كانت خلف دارنا ..هاها .. يااااه شو كان فى إشيا وإنمحت .. الله يرحمون ويرحمنا جميعاً

انا ياماما خَلَص .. رح فارقك عن قريب.. مابقدر ابقالك طول العمر حبيبتى
 لاهيك بدى ياكى تحافظى على كل شئ بهالصندوق متل عيونك .. واكتر شوى كمان

فيه مفتاح رح بتلاقيه .. ملفوف بمنديل جدك لمطرّز .. اياكى تغسّليه
كان جدك حامله يوم ماضربوه بالرصاص وبه نقط من دمه الزاكى ..
إحمليه وتنفسى ريحته يامليكة .. رح نكون كلنا حاضرين كرمالك

المفتاح الذهب يلى بتلاقيه هونيك .. إلبسيه عاصدرك .. ماتخليه يفارق روحك ولا عقلك ابداً يابنت .. هايدا المفتاح هو يلى بقى من كل عيلتنا بأرض الوطن
وحين مانتحرر بإذن الخالق .. ارجعى للبيت .. بيتنا
وعمّريه من جديد

وازرعى الزيتونة من جديد .. واللوز والعنب
ارضنا هونيك كتير مخصّبة منُّا قاسية .. وبتطرح نبت ولا اطيب .. كانوا بيتحاكوا بحصاد هالأرض حتى أخر يوم ..
 حتى قطفوا الزرع قبل أوانه .. ومات ! .. وصارت الارض بيوت .. لغيرنا

لا تبكى ياكبدى .. منو نافع البكا .. جربناه كتير ومافلح
كل ماتشتاقى لجدتك وللزيتون والتراب المخضب بأجمل ايام
إتمسكى بالفتاح أكتر .. وكونى حدا مُخلِص ..
 .. ماتنسيه

كونى إشى أحسن منهن كلياتهن

.. تاتقدرى تعودى وتعمّرينا ببيوتنا من جديد يامَليكة .. !