قتلوا الضنا ...

قتلوا الضنا قدام عينيكي في الميدان
يا حزنك اللي غمر وطن متهان

"الله أكبر" بصوتك زلزلت أرضك
خلت عساكر غُشم يحبّوا على يدِّك

سامحينا يامّة الظلم مش قدّك
ولا قد دعوتك واثقة في قصاص رحمَن

مين اللي قال صوتك خلاص إنكتم
بقتل الوليد قلبك إنكسر وانهزم
مين اللي قال سندك خلاص إنعدم
وخطوتك قِوّة .. بترج ألف ميدان

دم الشهيد يامّة يحنّي كل جبين
سايل على خدودك بدل دموع العين
بيعلنها للي انهزم .. كلنا صامدين
لِموا الحواشي وفتّحوا الزنازين
اللي قتل إبني سفّ التراب مـ الندم

خبّط بإيد العزم على كل حيطة وحجر
لا عمره فاز فرعون ولا هامان إنتصر
دة هي ساعة ظلم .. عقاربها بتنكسر
من قبل حتى مايتهنّى بيها الملاعين