أنا البنت اللي لما بتشوف زوجات الشهدا بتتكسف من نفسها
نفسها تكون حاجات كتير لدرجة إنها أحيانا .. مابتكونش أي حاجة
بتغنّي لسيناترا وإلفيس .. وبتحاول تتعلم ترتيل القرءان زي شيخ السديس أو سعود الشريم
بتحب الألوان والشمس .. وبتحب تكون لوحدها أغلب الوقت
نفسها في بيت الزوجية يمكن أكتر من فكرة الزوجية نفسها
نفسها في بنت وولد تطلعهم عباقرة .. وبيهم تربي نفسها من جديد
بقالها أكتر من سنة تقريبا معتزلة المناقشات السياسية تماما
بل إنها مش بتتفرج على أخبار غير كل كام يوم مرة على الطاير كدة
بتحب الرسم .. والأكل .. والتمشية .. والقطط.. والمخدات المنفوشة
والكتابة في حد ذاتها .. والقراءة .. وأغلفة الكتب المتصممة بمزاج
ومسلسل هاوس .. وقناة فتافيت وناشيونال جيوجرافيك لما تحب تفصِل
وقناة فرانس 24 لما تحب تحس إنها شايفة العالم كله
بس غالبا يعني بتحب تفصَّل الواقع على مزاجها .. عشان كدة بتحب الأفلام
وخاصة الأفلام اللي أغلبها سكوت .. ونظرات ..
بتكره الممثلين والمغنيين وحياة المشاهير .. والناس اللحوحة.. والحشرات وشعر القطط اللي بيلزق في كل حتة.. وصوابعها لما بتسقع .. وآخر كوباية الشاي بلبن .. وإنها تتفهم غلط .. والإبتسامة اللي بتكون بالعافية من باب اللباقة والذوق .. وإنها تبقى مُكلفة بتنفيذ حاجة هي مش مقتنعة بجدواها أو أهميتها .. وإلغاء المخططات .. والأمهات الشريرة ..والرجوع في الكلام
والعشم في الناس ..والصوت العالي رغم إنه أحيانا صوتها بيعلى !!
وبس كدة لـ دلوقت
..
اتفرجوا على الفيلم دة بقى !!
ليست هناك تعليقات:
إرسال تعليق
همسًا حدِّثُني ..