17‏/12‏/2011

يدوم عزّك !



إنفرط اللولى من عقدك .. يوم مافرّطتى فى دم ولادك
إنقطع الصوت من حسك .. يوم ماحرمتى الناس من زادك

إيه اللى جابرك تستكتى .. خرستى ليه إتكلمى ؟؟
ليه راضية بالـ"مفعول به" .. وشقانا نلبّسك تاجك !

لو عايزة ظلم مش كدة .. كفايانا يوم من غير عشا
ضربك رصاصة فى ضهرنا؟؟ .. دة شهيد لا يمكن يتنسى

قالوا سواد العسل ..!
.. قلت : ألعنّ!
قالوا تموت ولا تاخد حقها ..!
.. قلت : أهونّ!
  قالوا مستحيل يوم تإمنلها
 .. قلت : يمكن!
أصلى ياما نمت فى ضل حضن شجرة منّها !

انا فاهمها هى كدة .. بتسوق وتتمرع فيها
عارفانى عاشق حبّها ولا ملّيت فى يوم حكاويها

لون الشجر .. لون القمر .. أروع مايتوصف فيها
ولّا السما .. اه مالسما .. ولهان ليلاتى اناديها

" كفاية دم .. سايل نيل .. جايبك من شرقك لغربك
لو كان ينبِّت فيكى أصيل .. كان فرش العنان زرعك !
انا اللى راضى اموت و أتهان .. علشان يدوم عزك
.. ويفضل حاضر على اللسان وبالدم عالجبين إسمك!"

هناك 7 تعليقات:

  1. عشان ايه دا كله
    لا ضلها بيحمينى ولا شجرها بيضللنى
    انا دايما فيها غلبان
    متهان
    ذليل وندمان
    ما تقوليش انها احسن بلد فى الدنيا
    فيه بلاد كتيره احسن منها
    ولا حضنها بيدفينى
    لأ دا بيكوينى

    ردحذف
  2. ما الأسوأ من فقدان الإنتماء والوطنية ؟!

    ردحذف
  3. كفايه فعلا

    تعبنا بس مش منها من اللى فيها

    ردحذف
  4. جميله جدااا
    تسلم ايدك

    ردحذف
  5. شكرا جزيلا لمروركم

    ردحذف
  6. لا حول ولا قوة إلا بالله

    قلوبنا معاكم .. بس شو نعمل .. لا يسعنا إلا الصلاة من أجلها والدعاء لها

    ربنا يحفظها يارب وترجع احسن من الاول

    ردحذف
  7. امين يارب
    تسلمى امتياز

    ردحذف

همسًا حدِّثُني ..