28‏/06‏/2012

هى زهقت أوى !







هى أى نعم مش سهل تحافظ على الضحكة اللى بتبين سنانها
بس ساعات بتبقى عايزة تضحك حتى للحيطة وللأغانى
وبتبقى فرحانة بدون سبب وبتقعد تتخيل إنها من سعادتها خفيفة ومش لامسة الأرض
بس الجاذبية دايماً بتحاول تحبِطها
وهى بنت صغيره مش هاتقدر تحارب حاجة كبيرة أوى كدة بحجم الأرض والسما
فقررت تعوم بدل ماتطير

المية زى الهوا برضو .. المهم يكون مافيش أرض تحتها وتفضل تحس إنها خفيفة وقادرة تتحرك زى البالونة الهيليوم

البحر حلو .. هى بتحبه
بس ممكن يغرقها
وهى بتخاف منه لما يكون هو الكبير
وهى تايهة وصغيرة ومش قادرة تقف
بتخاف
وخوفها لوحده بتحس إنه ممكن يغرّقها

طيب .. البحر والسما مش نافعين دلوقت

الهوا الناعم على الشط ممكن يكفى

بس الشط بعيد
وهى مش عارفة تروح لوحدها
لأن فيه عفريت على شكل ورقة مكرمشة كبير أوى واقف على باب أوضتها

هى زهقت !
ونعكشت شعرها وحطت روج أحمر
هى زقهت أوى فعلاً

هاتفتح بلكونتها للعصفورة الرفيّعة الغبية اللى دايماً بتاكل الوردة كل ماتكبر
هاتعمل إيه طيب ! مش احسن ماتبقى لوحدها ؟!

هاتسمعه بيغنيلها بصوته المبحوح اللى بتحبه قد البحر :
" هى اللى الشمس ماكانتش تشرق .. إلا اما تفتح .. شباكها "
وهاتبتسم وخلاص .. ومش مهم لمين !

هناك 14 تعليقًا:

  1. حسام يحيى6/28/2012 3:32 م

    مهم لمين :)
    مُبهرة معانيها كأسلوبها كصاحبتها :)

    ردحذف
    الردود
    1. احياناً بس مش على طول :)
      تسلم ياحسام :):)

      حذف
  2. احاسيس مختلفة مشاعر فياضة
    نغم دافىء
    ابداع رائع هنا

    ردحذف
    الردود
    1. نسيت أن تضيف .. " زهق قوى " :)
      اشكرك مصطفى ,, سعيدة بطلّتِك

      حذف
  3. الزهق الممتع :)

    ردحذف
  4. غريبه مختلفه بس جميله جدااا
    انه الزهق المسيطر علي الاجواء احم

    عجبتنى علي فكرتين ^_^

    ردحذف
    الردود
    1. وبحبك على 3 فكرات ^_^

      حذف
  5. انا رأيي من رأيها...مش مهم لمين تبتسم ...المهم انها تبتسم

    جميله جدا

    ردحذف
  6. المهم أنها ابتسمت فى الأخر :)
    جممميلة :)

    ردحذف

همسًا حدِّثُني ..