18‏/11‏/2012

ناموا .........



خلاص يامحمد
مش لازم تظبط المنبِّه !
..

الصبح وأنا قايمة أصحّيهم كنت بردانة حبتين
خفت عليهم لا يستهووا فـ قلت أتقِّل لهم في الهدوم

والله كان على عيني ينزلوا
بس كان لازم يقوموا يغيروا ويفطروا بسرعة عشان مايفوتهمش باص المدرسة
حَكِم لو فاتهم مش هيعرفوا يروحوا المدرسة وهيضيع عليهم اليوم ومش هنلاقي حد يشرحلهم الدروس

عارِف يامحمد
الواد سعد قعد يزِّن زي عوايده عشان مش قادر يقوم
قعد يقولي ياماما سيبيني شوية
زعّقتله يا محمد
زعقتله وشديته من دراعه عشان يقوم ويبطل دلع
وقوِّمت البت منال بالعافية زي كل يوم
قولتلها قومي فزّي ماتوجعيش قلبي

أنا أسفة يامحمد
أنا أسفة
أنـا.....
...
هههه
قال إيه " ماتوجعيش قلبي "
وجع قلب إيه بس وهم كانوا نايمين في حضني
علام إيه وهباب إيه ؟!!
يلعن أبو اللي قال يتعلموا
يلعن أبويا أنا عشان صحّيتهم
يلعن أبويا يامحمد
يلعن أبويا!
فيها إيه يعني لو كانوا غابوا النهاردة عن المدرسة
كان زمانهم ...

الله يلعنك سبتني ليه أصحّيهم
ما انت كل يومين بتقولي ماتسيبيهم النهاردة يريحوا
إشمعنا النهاردة يامحمد ؟؟! إشمعنا النهاردة

خلاص
ناموا ..
ناموا ياولاد واتغطّوا كويس
وإنت ياسعد .. إنت الكبير .. خد بالك من أختك وماتسيبش إيدها

ناموا ياحبايبي
ناموا ...
أنا أسفة
أنا أسفة إني صحّيتكوا .........

هناك تعليق واحد:

همسًا حدِّثُني ..