عم عبدالمجيد بتاع الجرايد
دايمًا واقف على اول شارِعنا
يوم مابصحى متأخر على ميعاد المحاضرة مابكونش زعلانة عشان هيفوتني شرح او حاجة مُهمّة
لأ .. بزعل لان دة معناه إني مش هتصبَّح بـ وشّه السَمِح و جُملته بتاعة كل يوم .. " صباح الفُلّ يادكتورتنا
رغم إنه بيبيع حاجة في كآبة جرايد مصر .. إلا إني عمري ماشفته غير مُبتسم وبشوش
ورغم إني نادرا مابجيب جرايد .. إلا إننا أصحاب جدا
هدومه البسيطة وطاقية الصيادين على راسه صيف شتا .. تحسسك قد إيه إنه مش لازم تكون غني عشان تبقى راضي وسعيد
عمره ماقال جُملة من غير ضحك أو نُكتة في آخرها
وتقريبا كدة ... عمره ما قرا جرايد !
الناس اللي زي عم عبدالمجيد كتير
إحنا اللي في زحمة أيامنا مش بنحس بوجودهم
ولا بنحمد ربنا على شوية الدفا اللي بنلاقيهم في الضحك معاهم
بوجودهم الغير ملحوظ .. بيعيدوا توازن الإنسان جوانا
زي سواق التاكسي اللي ركبت معاه إمبارح
دة بقى بيقرا جرايد وبيتفرج على النشرة كمان
وبيتكلم في السياسة وحال البلد مع زمايله على القهوة .. ومع زباينه الرُكاب لحد مايوصلهم
إتخرّج من كلية تجارة .. وبقاله عشر سنين في الـ"كار" على حد قوله
فكرة قد إيه هو واعي وفاهم لكل حاجة في البلد مش هو دة اللافت أو الجديد .. ياما الواحد بيقابل ناس غلابة يستحقوا لقب "محلل سياسي " .. لكن من خفة دمه ونُكَته اللاذعة حسيت قد إيه هو شاف في حياته وقد إيه بإبتسامة وتُكال على الله بيصبر ويبدأ من جديد
إحنا شعب .. عارف وشايف .. وبيصبُر بالضحك والإبتسامة الحلوة
قادر يستحمِل كتير .. قادر يقوم يقاوم ويعافر
.. أهم حاجة يلاقي مَنفَس يضحك .. ويسمّعك آخر نُكتة
طب شفتى بقى أطفال فى عز البرد رايحين المدرسة بهدوم خفيفة أوى ما تدفيش أجسامهم الضئيلة و فى نفس الوقت مبسوطين و بيتنافسوا من فيهم هيستهجى الكلمات الإنجليزى اللى حافظها صح ^_^. شفتى عم "فرحة" بتاع المانجة إللى كنا بنشترى منه المانجة فى عز رمضان و الحر و يدينا واحدة هدية :D شفتى الجاة -إسمها كده على فكرة- و هى بتفرش خضارها الصبح بدرى الساعة 7 على الرصيف، خضار ألوانه كتير و حلوة و الأحلى من الألوان ضحكتها <3
ردحذفوشفتي الست الكبيرة في السن اللي بتبتسملك بدون سبب :)
ردحذفوشفتي الولد اللي كان بيلعب كورة وقد إيه فرح لما شطتهاله وفضلنا نلعب سوا شوية ونضحك ^^
وشفتي الزهرة البمبي اللي نبتت من بين أحجار الرصيف ؟!!!
على حسب نظرتك هتشوف الجمال في الحياة .. الفرحة رزق من ربنا ♥
و لأن الفرحة نصيب :)
ردحذفشفتى إزاى الصحرا الممتدة ورا الهرم حلوة و جميلة و واسعة و مهلكة و ساعات تلاقى فى الهلاك فتنة ^_^.يمكن علشان بالنسبالك حدودك الهرم و الصحرا اللى بعده مالهاش حدود.
شفتى الزرعة الحلوة اللى نبتت جنب الصرف الصحى فى حارة معدمة عمر ما دخلها شمس! طلعت إزاى و من بيراعيها!
شفتى الولاد اللى كانوا بيلعبوا بقطة صغيرة مولودة و لما جريت عليهم من خوفى على القطة لتموت؟ كلهم حسوا بالذنب لدرجة إن واحدة منهم جابت علبة فاضية حطتهافيها و راحت رجعتها لمامتها و فضلت قاعدة مستنية جنبها لبعد المغرب لحد ما الأم رجعت.
طب شفتى فرحة نفس البنت باللعبة اللى إدتهالها لإنها عمرها ما جالها زيها قبل كده.
طب شفتى و إنتى خارجة الصبح بدرى قوى و الجو برد جدا والهواء ييجى على وشك يفوقك لجمال الكون و جمال الكون من جمال ربنا.
شفتى عم كمال سواق الأتوبيس إللى عمرى ما إتكلمت معاه فى حياتى و هو بيستنانى الصبح رغم إنى متأخرة و بيسألنى مجيتش إمبارح ليه؟
شفتى الشتا و هو مغرقك و إنتى ماشية فى الشوارع الفاضية مع واحدة صاحبتك و مش عايزيين تروحواأبدا.
اللحظات الحلوة دى نقدر نحوشها فى قلوبنا. يزيدك فرحة و هنا :)
طلّتك على عالمي هِنا في حد ذاتها فرحة وهنا :) يسعد أيامك ياحلوة ويزيدها حلا ♥
حذفحلو جدا الكلام . ويخرب بيت جمال دا احساس .
ردحذفبجد شيء رائع . رسم على شفايفي ابتسامة بطريقة غير عادية .
ومشاعر دغدغت قلبي خليتة يرقص . يعيد ذكريات . يفكر في اللي فات .
وقعدت اشوف عم الحاج وست الحاجة . وصباح الفل . وربنا يسترك .
روح ربنا يجعل في وشك جوهرة وحنكك سكرة .
المشكلة ان الموضوع ما انتهاش . فلما نزلت تحت شوية وشوفت التعليقات لاقيت قد اية فعلا لازن نفتكر . الوشوش الحلوة اللي فعلا مبتسمة دايما وبدون سبب الا انها بتخليكي انت كمان تبتسمي . تحسي معنى الجمال . تعرفي يعني اية الرضا . تشوفي النعمة . تحسي الحب في كل كلمة . في كل بصة وحركة عفوية .
تحياتي وتقبلي مروري .
يسعد أيامك شرقاوي :)
حذف