27‏/12‏/2012

رغي ..!


1- الفيسبوك كائن غبي ومؤذي !
ورغم دة أنا مدمناه إلى حد كبير

2 - النهاردة يعتبر لسة بدري على نهايته ، بس حاساه طوِّل أوي
كنت عايزة أنزل في الشمس اللي شايفاها من بلكونتي دي بس مش حاساها
الشمس مالهاش لازمة مادمت مش حاسس بيها بتلمسك !
 
3-  الناس الأغبية اللي مش بترد على موبايلاتها
هتموتوا قريب ! ..لوحدكم ! ومحدش هايعبركوا !

4 - بقالي كتير ماكتبتش حاجة عليها القيمة

5 - حاسة إني في مرحلة لازم يحصل فيها تغيُّر جذري في حياتي
بس مش فاضية تقريبا أو فيه حاجة غير مرئية ومنطقية منعاني!

6 - الملل
 الروتين
 نفس الوجوه
 والشخصيات
 والحوارات
والخناقات
والاكلات
والأحلام
 والأفلام
واللبس
 وأساتِك الشعر
 والنسكافيه
 والشاي بلبن
والكركديه
والدفّاية اللي بتجيب حر بس مابتدفيش فعليا
 والرغي
واللك
 واللت والعجن
 والنوم
 والصحيان
 والموبايل
والشاحِن
 واللاب
 والنت
 والفيس
والإنبوكس
 والبروفايل
 وتتبع كل بوستات الشخص إيّاه
 والملل
 والزهق
 والقرف
 والكتاب الرائع اللي قررت أقرأه على أساس إنه هيصلَّح كتير من كلاكيعي وفي الآخر من كتر جماله حسيت قد إيه أنا مكلكعة وكآبني أكتر !
والإكتئاب
ثم الإكتئاب
ثم الإكتئاب
والفرحة الغير مبررة اللي دايمًا بيتبعها بكاء غير مبرر برضو وعلى أتفه حاجة
 والرغبة في حاجات كتير
والأمال
والسعادة
والتفاؤل الغير منطقي

 والديجافو
 والشيزوفرينيا
 والمووديّة الحقيرة
 والمادية الأحقر
 والدبدوب الغبي اللي دايما يقع من ع السرير وانا نايمة
  والصحيان من أساسه في أم دي عيشة وأم دي نفسية !

هناك 4 تعليقات:

  1. غير معرف12/27/2012 2:41 م

    صلي ع النبي في قلبك :D

    مش مهم يبقى في تغيير مادي في الحياة ، المهم يبقى في تغيير روحي واحساس ما بإن في شيء جميل جاي ، مختفي متأخر لسة مجاش لكنه جاي ، يجي في رسالة بشرية رسالة الهية مضمون حسي مضمون معنوي ، يجي عن طريق الفون عن طريق الفيس أو فيس تو فيس ، يجي من حد تعرفيه من حد متعرفيهوش .. يجي في مكان رئيسي في أو في مكان فرعي ، المهم تنتبهيله لإنه أكيد جاي ، الحياة مبتتاخدش قفش .. عشان مفيش حاجة مميزة وكله زي بعضه كل يوم يبقى في حاجة غلط .. لا الغلط اننا مش بننتبه ان في جديد حوالينا ويمكن يكون تم فعلا بس احنا اللي متأخرين عنه مع ان جه فعلا ..
    بصي حواليكي وركزي وعيدي النظر في الجو المحيط ، ولا تلقي بالا لمن لا يلقي بالا بإلقاءك له بالا ( حلوة اللخبطة دي ) انما قدري من يلقون لك بالا وانت عنهم غافلة ،

    ربنا يصلحلك الحال يا رب

    ردحذف
  2. مش عيب .. أحيانا بنحب نرغي مع نفسنا ونفضفض ونقول احساس متلخبط جوانا ونبعبع :)
    رتبي ورقك هيطلعلك منه جديد أكيد :)

    ربنا يوفقك

    ابراهيم العدوي

    ردحذف
  3. كلنا هذا الرجل غاليتي
    كلنا زهقنا وتعبنا بس برضه الحياة بتستمر
    يبقى الأحسن نخليها تستمر برضانا وبطيب خاطر بدل ما تستمر غصب عننا واحنا موجوعين

    ربنا يسعد قلبك يارب دنيا وآخرة

    ردحذف
  4. احم صلي عالنبي ولما الحاله ده تيجي اشربي حاجه دافيه وادخلي نامي
    انا بعمل كدا والله وبتجيب نتيجه هايله والله :D

    ردحذف

همسًا حدِّثُني ..